Беласица не се предава. Со засилен тимски дух, неколку нови засилувања и искусен шеф на стручниот штаб, дојде првата пролетна победа. Остварен е важен триумф (2-4) на гости против Ренова, а најзаслужен за тоа секако е крилниот напаѓач Антонио Каланоски кој постигна хет – трик.
Беше незадржлив за одбраната на Ренова, проигруваше, дриблаше, но и најважно – постигнуваше голови. Трипати ја тресеше мрежата на „гипсарите“ и се погрижи за успешен пролетен старт на Беласица, и уште поважно, враќање на реалните можности да се обезбеди опстанок во елитата. Сега конкурентите и не се така далеку, а има уште многу да се игра до крајот на сезоната.
Антонио Каланоски со одличното издание го заслужи епитетот најдобар играч на 19. коло во Првата фудбалска лига, во изборот на МАКФУДБАЛ.
