Мохамед Салах (32) е најголемата ѕвезда на Ливерпул во последните седум години. Одличниот Египќанец одигра 358 натпревари, постигна 217 голови и забележа 94 асистенции, а со англискиот клуб освои осум трофеи. Неговата ера би можела да заврши на крајот од оваа сезона, односно летото 2025 година, кога му истекува договорот.
Тој на почетокот на септември најави дека би можел да замине во јуни следната година.
Ливерпул, кој со години го водеше Јирген Клоп, а сега нов тренер е Арне Слот, би можел да започне потрага по замена за Салах. Според „Билд“, Карим Адејеми (22) е потенцијален наследник на Салах, а скаутите на англискиот клуб наводно повеќепати го следеле во Бундес-лигата.
„Ливерпул сака да го ангажира Адејеми како наследник на суперѕвездата Мохамед Салах. Договорот на Египќанецот истекува следното лето и сите знаци упатуваат на разделба“, пишува германскиот медиум.
Салцбург го купи како 16-годишник за 10 милиони евра, а Борусија Дортмунд плати 30 милиони евра за него.
Адејеми е крилен напаѓач на Борусија Дортмунд и германски У-21 репрезентативец.
Борусија во летото 2022 година за него исплати обештетување од 30 милиони евра. Откако дојде во Дортмунд, одигра 74 натпревари, постигна 19 гола и забележа 13 асистенции. Одлично ја започна и актуелната сезона, во која на осум настапи постигна пет гола и исто толку асистенции. Воодушеви со хет-трикот против Селтик (7-1) во Лигата на шампионите, по што се повреди.
Договорот на Карим Адејеми со Борусија Дортмунд важи до летото 2027 година.
