Доаѓањето на Чаби Алонсо на клупата на Реал Мадрид требаше да донесе свежина, модерни идеи и нова енергија, но изгледа дека почетниот период на адаптација не минува мазно. Резултатите се добри, но очигледно е дека нешто не функционира најдобро.
Според информациите што ги пренесува „Атлетик“, дел од соблекувалната на „кралскиот клуб“ е незадоволен од строгите правила што шпанскиот стратег ги воведе уште од првиот ден.
Алонсо веднаш по доаѓањето почнал со „сечење на лошите навики“ — построги распореди, повеќе работа во теретана, детални видео-анализи и поголема дисциплина кои станале секојдневие. Сепак, таквиот пристап не им легнал најдобро на сите во соблекувалната.
Извор близок до еден од важните играчи открил дека во соблекувалната се слушнале и вакви зборови: „Мисли дека е Гвардиола, но тој е само Чаби!“
Дел од фудбалерите сметаат дека воведените мерки се претерани и дека со новиот режим тренерот покажал недостаток на почит кон ѕвездите кои со години го носат Реал до трофеи.
Од друга страна, Алонсо не отстапува и верува дека токму цврстата дисциплина е клучна за клубот да остане на највисоко ниво и по промената на генерациите.
Искусниот стратег се обидува да изгради култура која потсетува на онаа што самиот ја доживеал како играч под водство на Анчелоти, Гвардиола и Мурињо – само по негов вкус, уште построга.
Дали „шок-терапијата“ на Чаби ќе донесе резултати или ќе предизвика внатрешни потреси во Мадрид, останува да се види. Едно е сигурно: Реал влегува во нова ера, а таа нема да биде нималку лесна.
Алонсо неодамна ја запиша својата прва победа во првото „Ел Класико“ како тренер, совладувајќи ја Барселона со 2-1. Реал во моментов има пет бодови повеќе од големиот ривал.
