Тренерот на Наполи, Антонио Конте, ги анализираше настаните по вчерашниот пораз од Лацио со минимални 0-1 во натпревар од 15. коло на Серија А. Ова беше втор последовен пораз за Наполи од истиот противник, откако во четвртокот беа елиминирани од Лацио во осминафиналето на Купот на Италија.
Конте ја оцени играта на својот тим позитивно, нагласувајќи дека Наполи се движи во правилна насока.
„Мислам дека натпреварот јасно покажа дека сме на прав пат, бидејќи се обидуваме да играме агресивен фудбал, да ја преземаме иницијативата и да создаваме опасности. Сепак, мораме да ги подобриме центаршутевите и завршните удари. Ова не е првпат да минуваме многу време во противничката трета зона, а да не ги искористиме тие шанси. И покрај тоа, не сум разочаран од играта, бидејќи момците дадоа сè од себе, покажаа борбен дух и решителност“, изјави Конте.
Поразот ги спречи „наполитанците“ да се вратат на првото место на табелата, кое сега го држи Аталанта по нивната победа над Милан.
