Алваро Карерас (22) повторно е дел од Реал Мадрид. Младиот шпански лев бек пристигнува од Бенфика за трансфер вреден 50 милиони евра, сума што „кралевите“ ќе ја исплатат во рати. Договорот на Карерас со мадридскиот гигант важи до 2031 година.
Карерас одигра силна сезона во Бенфика, со 52 настапи, четиро гола и пет асистенции во сите натпреварувања. Во Реал доаѓа да ја засили конкуренцијата на левата страна од одбраната, каде конкурираат и Фран Гарсија и Ферлан Менди.
Ова е четврто засилување за тимот на Шаби Алонсо летово, по трансферите на Трент Александер-Арнолд, Дин Хујсен и Франко Мастантуоно.
Карерас не е непознато име за Реал – беше дел од нивната академија до 17 години, пред да замине во Манчестер Јунајтед. Таму не доби вистинска шанса, и по неколку позајмици – вклучувајќи ја и онаа во Бенфика – беше продаден за 6 милиони евра. Јунајтед имаше можност да го врати за 18 милиони, но не ја искористи таа опција.
