Јувентус е подготвен да му понуди на Пауло Дибала нова соработка со договорените услови од октомври минатата година, но под услов неговиот менаџер да се откаже од поголемиот дел од провизијата, објавија италијанските медиуми.
Во октомври беше договорено продолжување на договорот според кое Дибала би имал годишна плата од 8 милиони евра, плус два до три милиони евра во облик на бонуси.
Но, тогаш Јувентус, делумно поради честите проблеми со повредите и осцилациите во формата на фудбалерот, му понуди договор со значително помала плата. Ова го налути аргентинскиот напаѓач чиј договор истекува во јуни и може да го напушти клубот без обештетување.
Сега Јувентус повторно ги понуди истите услови како во октомври, но под услов неговиот менаџер да се откаже од поголемиот дел од провизијата. Јувентус се надева дека ќе дојде до раздор меѓу Дибала и менаџерот и дека желбата на Дибала да остане во торинскиот клуб ќе надвладее.
Дибала е во Јувентус од летото 2015 година кога пристигна од Палермо во трансфер вреден 41 милион евра. На 281 натпревар за Јуве, тој постигна 112 гола.
