Само три дена по својот 18. роденден, младиот талент на Барселона, Ламин Јамал, официјално го стави својот потпис на новиот долгорочен договор со клубот, кој ќе важи до 2031 година. Потпишувањето беше одржано во клупските простории во присуство на претседателот Жоан Лапорта и неговото семејство.
Со ова, Барса го искористи моментот и за конечно да го потврди новиот број на дресот што ќе го носи Јамал — од сега ќе игра со легендарната „десетка“. Претходно играше со број „19“, но сега го наследува бројот што го носеа икони како Диего Марадона, Ромарио, Роналдињо и Лионел Меси.
Јамал го заслужи новиот договор и симболичниот број „10“ благодарение на своите извонредни настапи: 25 голови и 34 асистенции на 106 натпревари за првиот тим на Барселона уште пред да стане полнолетен. Со тоа, тој веќе урна низа рекорди – како на клупско, така и на национално и меѓународно ниво.
Денешните настани беа пренесувани во живо преку дигиталните канали на клубот. Прво беше откриен новиот број преку објава на социјалните мрежи, преку слика на импресивен графит во неговиот роден крај, Рокафонда, каде во центарот беше бројот „10“. Потоа беше објавено и тематско видео.
Малку подоцна, клубот објави и фотографии од моментот кога Јамал првпат позираше со дресот број „10“, заедно со Лапорта и неговите родители, непосредно пред да го потпише договорот. Подоцна се упати и во клупската продавница на „Камп Ноу“, каде што одговараше на прашања од новинарите.
Барселона со овој потег уште еднаш покажа колку верува во својот „златно момче“, подготвувајќи го за водечка улога во годините што следат.
