Интер Мајами, американскиот фудбалски клуб во сопственост на Дејвид Бекам, се појавува како еден од главните кандидати за трансферот на Кевин де Бруин од Манчестер Сити. Белгискиот играч за врска, чиј договор истекува на крајот од оваа сезона, се смета за приоритетна цел на тимот во текот на летниот трансферен прозорец.
Ако Де Бруин не потпише нов договор со Манчестер Сити во наредниот месец, тој ќе може слободно да преговара со други клубови, вклучувајќи го и Интер Мајами. Американскиот клуб, кој веќе ги ангажираше големите ѕвезди како Лионел Меси и Луис Суарез, може да испрати конкретна понуда за да го донесе Де Бруин.
Претходното лето интерес за Де Бруин покажа и клубови од Саудиска Арабија, но белгискиот играч реши да остане уште една сезона во Манчестер Сити. Сепак, оваа сезона не се одвива според неговите очекувања. Тој пропушти дел од натпреварите поради повреда, а Манчестер Сити доживеа слаб период без победа во текот на ноември.
Доколку Интер Мајами успее да го ангажира Де Бруин, тоа би значело уште еден значаен чекор во амбициите на клубот да стане глобален фудбалски центар.
