Фудбалската репрезентација на Канада се пласираше во полуфиналето на Копа Америка, откако синоќа по изведување пенали ја елиминираше Венецуела во четвртфиналето. По регуларните 90 минути беше 1-1, а дури тројца Венецуелци беа непрецизни во пенал рулетот.
Канаѓаните подобро го отворија натпреварот и во 13. минута Шафелбург погоди за 0-1, што беше и резултат на првото полувреме.
Венецуела успеа да израмни во 65. минута, кога легендарниот Саломон Рондон ја искористи асистенцијата на Арамбуру и израмни на 1-1.
Канада имаше неколку шанси за победа до крајот, но не успеа, па пеналите го решија победникот.
Во пенал рулетот во првата серија беа прецизни Рондон и Џонатан Дејвид, потоа промашија Ерера и Милар, а Ринкон и Бомбито погодија за 2-2. Повторно двајцата играчи промашија во една серија, четвртата – Саварино за Венецуела и Еустакио за Канада, а Кадиз и Алфонсо Дејвис погодија во петтата.
Во решавачката шеста серија, Ангел промаши, а Коне и донесе победа на Канада за да се пласира во полуфиналето каде ќе се сретне со Аргентина.
Овие две селекции играа и на отворањето на турнирот, Аргентина победи со 2:0, па јасно е дека и сега е фаворит за пласман во ново финале.
