Добро играме, ама гол не даваме: Романците си заминаа со бод од Скопје

Фудбалската репрезентација на Македонија и третпат ремизираше во септемвриската сесија од квалификациите за СП 2022. На арената „Тодор Проески“, македонските репрезентативци одиграа без голови против Романија. Беа подобри, но не го материјализираа тоа со победнички погодок.

Македонија почна агресивно, се закануваше по страничните позиции, но повторно недостигаше завршниот удар. Елиф Елмас во 27.минута се ослободи од двајца противнички фудбалери, шутираше со левата нога, но директно во добро поставениот Флорин Ница. Имаше обиди и од Барди, Алиоски, Милан Ристовски, но без ефект.

Романците се заканија во 31.минута кога Никулае Станчиу шутираше кон голот на Димитриевски, но македонскиот голман добро интервенираше.

На стартот на второто полувреме повторно Елиф Елмас имаше одлична шанса. Во 53.минута, Елмас продре по десната страна, шутираше силно со левата нога, но Флорин Ница повторно успеа да одбрани.

Енис Барди во 83.минута упати силен удар од 20 метри, но голманот на Романија повторно беше на вистинското место.

На овој натпревар, јубилејни 50-ти настапи во националниот тим забележаа Езгјан Алиоски и Кире Ристевски.