Фудбалерот од средниот ред на Франција, Аурелиен Чуамени, игра одлично на овој Мундијал и е меѓу играчите со најголеми заслуги за пласманот на „триколорите“ во финалето. Тој беше стартер на сите натпревари досега и го постигна првиот гол во победата од 2-1 над Англија во четвртфиналето.
„Против Аргентина мораме многу дисциплинирано да се браниме и да ги покажеме нашите најсилни квалитети. Да, го имаат Лионел Меси, но освен него имаат и 10 други исклучително квалитетни фудбалери“, изјави Чуамени.
„Свесни сме за можноста да испишеме историја и ќе се обидеме да ја искористиме“, додаде играчот од средниот ред на Реал Мадрид.
Финалето на Светското првенство во Катар е закажано за в недела во 16 часот.
