Репрезентативецот на Македонија и првотимец на рускиот Акрон, Бојан Димоски, треба да биде ново засилување за српскиот гигант Партизан. Левиот бек ќе пристигне во „Хумска“ прво како позајмен играч од рускиот клуб, но со опција за откуп од 200.000 евра.
Преговорите меѓу двата клуба се во завршна фаза, па Димоски ќе биде позајмен до лето, а ако сите три страни бидат задоволни, тогаш ќе се активира споменатата откупна клаузула.
Младиот лев бек пристигна во Русија во јули 2023 година од Брера Струмица. Тој ја започна својата кариера во Тетекс, а играше и за Вардар. Димоски ги има поминато сите младински селекции на Македонија, а за А репрезентацијата настапи на 18 натпревари.
