Карим Бензема повторно го подигна степенот на тензија околу француската репрезентација. Добитникот на „Златната топка“ на Инстаграм објави своја фотографија под која напиша „Не сум заинтересиран“.
Тоа се случува кога медиумите наголемо шпекулираат дали тој ќе се приклучи на тимот на „триколорите“ за неделното финале на Светското првенство против Аргентина.
Се чини дека Бензема ниту очекува ниту сака да игра во решавачкиот судир, иако сега е целосно закрепнат од повредата. Тој вчера дури учествуваше и во тајна контрола на Реал Мадрид, по што селекторот на Франција, Дидие Дешамп, беше прашан дали ќе смета на него против „гаучосите“.
Тоа е можно бидејќи Бензема и покрај повредата не беше исклучен од составот, а на негово место не беше повикан ниту еден друг играч. Сепак, Дешамп не сакаше да коментира на оваа тема.
