Барди: Оваа генерација има уште многу да даде, гладни сме за успеси

Репрезентацијата на Исланд е следниот предизвик за македонската фудбалска репрезентација во циклусот квалификации за пласман на Светското првенство во Катар во 2022 година.

„Треба да се концентрираме на нашата игра, она што се договараме пред натпревар да го изнесеме на терен. Противникот е силен, но многу работи зависат од нас, желба има, треба да бидеме стопроцентно концетрирани, да бидеме заедно како што сме до сега и да одиме на победа“ – вели Енис Барди.

Играчите кои можеби не го познаваат селекторот толку добро како нас кои не предводеше во тимот до 21 година на Европското првенство, многу брзо се вклопуваат во неговата филозофија, вели Барди.

„Треба постојано да се докажуваме, од нас се очекуваат резултати. Не гледам никаков притисок, гладни сме за да успееме, имаме многу да дадеме, оваа генерација е млада и може да даде повеќе успеси, ако се биде како што треба можеме да направиме многу“ – смета Барди.