Легендата на Баерн Минхен и германскиот фудбал, Томас Милер, денеска ќе испише историја во дресот на баварскиот гигант. Натпреварот против Борусија Менхенгладбах во рамките на Бундеслигата ќе биде негов 750. официјален настап за клубот, што го прави апсолутен рекордер во германскиот фудбал.
Баерн Минхен веќе ја обезбеди шампионската титула оваа сезона, па денешниот натпревар ќе има свечен карактер, посветен на Милер и неговиот неверојатен придонес за клубот.
Милер дебитираше за првиот тим на Баерн во 2009 година под водство на Луј ван Гал, а оттогаш до денес стана незаменлив дел од тимот. Во својата кариера со Баерн има освоено: 13 титули во Бундес-лигата, 2 титули во Лигата на шампионите, 6 трофеи во Купот на Германија, 8 Суперкупа на Германија, 2 Суперкупа на Европа, 2 Светски клупски првенства.
Покрај тоа, Милер има постигнато 248 голови и има запишано 274 асистенции на своето конто во дресот на Баерн. Со германската репрезентација го освои Светското првенство во 2014 година во Бразил и остави длабока трага и на меѓународната сцена.
Според најавите, Милер би можел да ја продолжи кариерата во САД, а како најсериозен кандидат се споменува тимот на ФК Лос Анџелес од МЛС лигата.
Без оглед каде ќе го продолжи својот фудбалски пат, денеска е ден кога Баерн Минхен, Бундес-лигата и целиот фудбалски свет му оддаваат признание на еден од најголемите фудбалери на модерното време.
