Камерунскиот голман Андре Онана и официјално ја промени средината, откако неговиот трансфер во Трабзонспор стана реалност. Играчот на Манчестер Јунајтед денес пристигна во Турција со специјален чартер-лет, а на фотографиите се појави во дресот на својот нов клуб.
Станува збор за едногодишна позајмица до крајот на сезоната, која беше можно да се реализира бидејќи трансфер-пазарот во Турција сè уште е отворен, за разлика од останатиот дел на Европа каде веќе е затворен.
Онана сезонава доби многу ограничена минутажа во редовите на „црвените ѓаволи“. Единствен негова официјален настап беше во Лига Купот против Гримсби, каде тимот загуби, а тоа уште повеќе ја намали неговата улога на „Олд Трафорд“. Токму поради тоа, клубот одлучи да го прати на место каде ќе добие повеќе шанси за редовни настапи.
По репрезентативните обврски со Камерун во квалификациите за Светското првенство, 28-годишниот голман директно замина за Турција за да ги финализира договорените детали со Трабзонспор.
