Капитенот на Манчестер Јунајтед, Бруно Фернандеш, повторно се најде во фокусот на клуб од саудиската Про лига, откако Ал-Наср испратил официјална понуда за неговиот потпис, објавува португалскиот весник „А Бола“. Саудискиот клуб, кој сега го предводи Жорге Жезус, има намера да изгради португалско јадро со Фернандеш, Кристијано Роналдо и најновото засилување – Жоао Феликс.
Жезус, кој добро ги познава квалитетите на Фернандеш од заедничкиот период во Спортинг Лисабон, лично учествува во преговорите со цел да го убеди плејмејкерот да му се приклучи на тимот. Тој го гледа како клучна фигура во амбициозниот проект на Ал-Наср, кој цели кон големи успеси и на домашната и на меѓународната сцена.
Раководството на клубот се потпира и на влијанието на Кристијано Роналдо, со кого Фернандеш има силна врска, како на теренот, така и надвор од него. Тие се одлично познаваат од настапите за португалската репрезентација, а токму таа блискост може да биде клучна за евентуален трансфер.
Претходно ова лето, Фернандеш одби огромна понуда од Ал-Хилал, која вклучуваше плата од 200 милиони фунти за тригодишен договор. Сепак, неговата иднина на „Олд Трафорд“ останува неизвесна, особено по неговата неодамнешна изјава:
„Ќе бидам тука сè додека клубот не ми каже дека е време да си заминам. На располагање сум за да ги вратиме славните денови на клубот. Но ако раководството смета дека е време финансиски да се искористи мојата вредност – тоа е фудбалот, понекогаш така се случува.“
Во меѓувреме, Ал-Наср веќе направи сериозен чекор кон создавање на ѕвезден состав со ангажманот на Жоао Феликс од Челси за 43,7 милиони фунти (50 милиони евра), со што уште еден португалски репрезентативец се приклучува на нивниот проект.
Во моментов, Бруно Фернандеш е дел од подготовките на Манчестер Јунајтед во САД. Англискиот клуб ќе го одигра последниот пријателски натпревар пред почетокот на сезоната против Евертон оваа недела, а се очекува плејмејкерот да биде стартер во тимот на Рубен Аморим.
