Истрагата на Премиер – лигата за Манчестер Сити продолжува со многу бавно темпо, но има развој на настаните. Според „Дејли мејл“, двете страни се договориле за датумот клубот да биде сослушан од независна комисија на крајот на следното лето. Англискиот шампион е обвинет за 115 финансиски неправилности во текот на 14 сезони.
Истрагата на „граѓаните“ започна во 2018 година. Познавачите на ситуацијата веруваат дека процесот можеби нема да биде завршен до крајот на следната сезона, кога истекува договорот на Пеп Гвардиола со клубот. Истрагата се одвива под највисоки можни безбедносни мерки и моментно е во фаза на земање изјави од сведоци, што би можело да трае до следната пролет.
Ако судењето продолжи во таа временска рамка, пресудата може да се очекува во летото 2025 година. Сепак, тоа може да биде одложено ако развојот оди против Манчестер Сити. Клубот нема право на жалба до Судот за спортска арбитража, но ќе бара други алтернативи.
Повод повторно да се зборува за истрагата на „граѓаните“ беше казната која ја доби Евертон.
„Карамелите“ беа санкционирани со одземање на 10 бода за едно прекршување на финансиските правила на Премиер – лигата. Според многумина, доколку се користеа истите критериуми, Манчестер Сити треба да испадне од елитата.
