Чаби Алонсо ја задржува работата во „кралскиот клуб“, откако Реал Мадрид оствари победа на гостувањето кај Алавес со 1-2 во 16. коло од Ла Лига.
Натпреварот на „Мендизороза“ донесе три погодоци, а „кралевите“ по серијата од два порази конечно се вратија на победничките патеки. Реал поведе уште од првата вистинска можност, во 24. минута, кога повратникот во стартниот состав Килијан Мбапе прецизно реализираше за 0-1.
Израмнувањето за Алавес стигна во 68. минута преку Карлос Висенте, чиј погодок беше предмет на неколкуминутна ВАР-проверка поради можна офсајд позиција, но главниот судија Виктор Гарсија на крајот го призна голот за 1-1.
Сепак, радоста на домашните беше краткотрајна, бидејќи само девет минути подоцна Родриго, по одлична асистенција од Винисиус, повторно го донесе Реал во водство и ги постави конечните 1-2.
До крајот резултатот не се промени, Реал Мадрид ја забележа својата дванаесетта победа сезонава и остана на „минус четири“ во однос на лидерот на табелата – Барселона.
