Португалија со 6-1 славеше над Швајцарија во осминафиналето на Светското првенство во Катар и си обезбеди четвртфинален дуел со Мароко. Ова беше последен натпревар од осминафиналната фаза.
Гонсало Рамош беше херој во убедливиот триумф на Португалците, постигна три гола и го забележа првиот хет-трик на овој Мундијал.
Во првиот меч од нокаут-фаза на Светските првенства тој погоди во 17, 51 и во 67 минута. Пепе, Рафаел Гереро и Леао постигнаа по еден гол. Единствениот гол за Швајцарија го постигна Аканџи по девет минути од второто полувреме.
Кристијано Роналдо доби шанса во завршните дваесетина минути од натпреварот кога веќе неговата репрезентација имаше високи 5-1 и осигурана победа.
На Мундијалот во Катар следуваат два дена пауза, четвртфиналните дуели се закажани за в петок и за в сабота.
