Ливерпул вечерва ќе го нагости италијанскиот првак Интер во реванш осминафиналето на Лигата на шампионите. На првиот меч во Милано, Ливерпул славеше со 0-2 и самоуверено се радува на следната фаза.
Сепак, Интер се надева на чудо. Тренерот Симоне Инзаги верува дека ако неговиот тим има еден гол предност по првото полувреме, може да се врати во игра на двомечот со Ливерпул.
„Нероаѕурите“ изминатиот викенд остварија убедлива победа од 5-0 над Салернитана, но тоа не е критериум за ЛШ. Симоне Инзаги нема да може се потпре на Николо Барела, а негов заменик во средниот ред најверојатно ќе биде Артуро Видал. Иван Перишиќ се враќа во акција на левото крило, а нападот треба да го предводат Хоакин Кореа и Лаутаро Мартинез.
Кај Ливерпул, можно е египетската суперѕвезда Мохамед Салах да остане резерва, а наместо него на теренот да излезе Луис Дијаз како партнер во нападот со Диого Жота и со Садио Мане.
