ФИФА донесе официјална одлука дека на сите странци од руските и украинските клубови ќе им се даде можност еднострано да ги прекинат договорите доколку до 10 март не се договорат со своите работодавци за начинот на понатамошна соработка.
Тоа значи дека ФИФА секој од овие играчи ќе го смета за слободен играч до крајот на сезоната во Русија или Украина. Во исто време, на сите ќе им се овозможи да најдат нов ангажман за даден период каде било во Европа.
„За да може овој исклучок да биде применлив и да се заштити интегритетот на натпреварувањата, дополнителниот рок за пријавување е ограничен на еден месец, кој завршува на 7 април во тековната година. Исто така, еден клуб ќе може да ангажира најмногу двајца играчи од Русија или Украина“, се вели во соопштението на ФИФА.
