Тренерот на Рома, Жозе Мурињо, е суспендиран на два натпревари поради исклучување на мечот против Верона во Серија А.
Мурињо, незадоволен од судијата, на натпреварот во саботата (2-2) влезе на теренот и се расправаше со судијата Лука Паирето. Фудбалската федерација на Италија соопшти дека Мурињо „изнел сериозни обвинувања“ кон Паирето и влегол на теренот со „заканувачки став“.
Португалецот ќе мора да плати и парична казна од 20.000 евра.
Мурињо гестикулираше кон Паирето како да телефонира, што италијанските медиуми го протолкуваа дека асоцира на таткото на судијата, Пјерлуиџи Паирето, кој беше вмешан во скандалот за местење натпревари во Италија во 2006 година.
Португалецот поради суспензијата ќе ги пропушти натпреварите против Специја на гости и против Аталанта во Рим.
