Фудбалската репрезентација на Холандија ја совлада Норвешка со 2-0 на домашен терен и обезбеди пласман на Светското првенство во Катар. Стивен Вергвајн во 84.минута беше стрелец на првиот погодок за „лалињата, а Мемфис Депај погоди во судиското продолжение.
Второто место во групата Г го освои Турција откако ја победи Црна Гора на гости со 1-2. Фатос Беќирај во четвртата минута донесе предност за Црногорците, но Турција направи целосен пресврт со головите на Керем Актуркоглу и на Оркун Кокчу.
Украина е патник во баражот за СП откако ја победи селекцијата на БиХ на гости со 0-2. Зинченко и Довбик погодија за Украинците на овој меч. Услугата за Украина дојде и од Франција која ја победи Финска на гости со 0-2, со головите на Бензема и на Мбапе.
Велс одигра 1-1 против Белгија на домашен терен. Кевин Де Бруин донесе предност за Белгија, а израмни Кифер Мур.
Чешка со 2-0 славеше против Естонија, а Летонија беше убедлива против Гибралтар и победи на гости со 1-4.
