Легендарниот шпански фудбалер и поранешен играч на Барселона, Андрес Иниеста, на својот 37. роденден потпиша нов двегодишен договор со јапонскиот тим Висел Кобе. Фудбалскиот волшебник ќе продолжи да ги воодушевува Јапонците со своите потези.
„Се чувствувам одлично на физички план и верувам дека можам да играм на високо ниво и во наредниот период. Би сакал да се заблагодарам на раководството за новиот договор и верувам дека заедно ќе оствариме многу успеси и во следните две сезони“, изјави Андрес Иниеста.
Тој мина 16 сезони во дресот на Барселона, одигра преку 750 натпревари, освои четири титули во Лигата на шампионите и девет трофеи во Ла Лига. Со репрезентацијата на Шпанија е освојувач на мундијалот, а има и две титули од Европско првенство.
