Пелистер во пролетниот дел од сезоната игра одлично, тимот на Димитар Капинковски нанижа неколку значајни победи и го трасираше патот кон опстанокот во Првата лига. Битолскиот тим вчера оствари важен триумф над Ренова (1-0), а тренерот ги префрли заслугите за победата над „гипсарите“ кај фудбалерите.
„Секој натпревар има своја тежина. Тој пред два месеци против Ренова беше сосема поинаков од овој. Многу психички и физички тежок натпревар за играње. Бодовите беа важни и за нас и за нив, а ние се обидовме да извлечеме максимум од екипата и без неколку стандардни поединци. Фудбалерите дадоа 200% од своите можности, дадоа максимум и беа наградени со тој гол. Ренова беше подоминантна, имаше шанси, неискористен пенал, но нашата желба, нашата пожртвуваност и мотивација за победа дојде до израз и не награди со три бода и важна победа“, изјави Капинковски.
За натпреварот против Македонија Ѓорче Петров во среда во Скопје во тимот се враќа Христијан Николовски, кој не настапи против Ренова заради акумулација на жолти картони.
