Потрагата на Милан по нов напаѓач доби нов пресврт. Откако клубот долго време беше насочен кон Душан Влаховиќ од Јувентус, а минатата недела инсистираше на Расмус Хојлунд од Манчестер Јунајтед, сега „росонерите“ се блиску до доведување на Виктор Бонифејс од Баер Леверкузен, пренесуваат бројни извори од Италија и Германија.
Двата клуба се во напредни преговори, а Милан веќе ја испратил својата понуда до „аспирините“. Се очекува предложената зделка – позајмица со опција за откуп вредна околу 30 милиони евра – да биде прифатена од Баер Леверкузен. Самиот Бонифејс веќе постигнал договор со миланскиот гигант и се надева дека трансферот наскоро ќе биде реализиран.
Нигерискиот репрезентативец помина две сезони на „Бај Арена“, а уште во дебитантската стана шампион во Бундес-лигата. На 24 години, тој има одиграно 61 натпревар со 32 гола и 12 асистенции во дресот на тимот од Леверкузен.
Милан сè уште не се откажал целосно од Хојлунд, но инсистира да го донесе на позајмица со опција за откуп, додека данскиот напаѓач бара постојан трансфер или најмалку позајмица со задолжителен откуп.
