Манчестер Јунајтед извојува драматична победа над Арсенал во натпревар од ФА Купот, триумфирајќи на пенали со 5-3 на „Емирати“ и обезбедувајќи пласман во следната рунда. Клучна фигура во овој успех беше турскиот голман Алтај Бајиндир, кој беше херој на „ѓаволите“ со две извонредни одбрани: во регуларниот тек на мечот го спречи пеналот на Мартин Одегард, а во пенал-серијата го одбрани ударот на Каи Хаверц.
Натпреварот во регуларниот дел и продолженијата заврши со резултат 1-1. Манчестер Јунајтед поведе преку капитенот Бруно Фернандеш во 52. минута, додека Габриел израмни за Арсенал во 63. минута. Само две минути претходно, Јунајтед остана со играч помалку, бидејќи Диого Далот го заработи вториот жолт картон.
И покрај бројчаниот хендикеп, Јунајтед се одбрани, а Бајиндир беше извонреден, особено со одбраната на пеналот на Одегард во 73. минута. Во пенал-серијата, играчите на Јунајтед беа прецизни, додека турскиот голман со интервенцијата против Хаверц го осигура победничкиот момент.
Оваа победа го истакна карактерот и борбеноста на тимот на Рубен Аморим, кој продолжува да се бори на повеќе фронтови оваа сезона.
