Европската Суперлига повторно е покрената, но овојпат под ново име – Обединета лига (Unify League). Според информациите на англискиот новинар Бен Џејкобс, новата верзија на одвоената Суперлига ќе има четири нивоа на натпреварување.
Минаа три години од оригиналната идеја за Европската Суперлига, која се распадна за само 48 часа поради лавина од негативни реакции од фудбалските навивачи низ Европа. Сега, промоторите на лигата, компанијата A22, се вратија со нов концепт.
Новиот формат предвидува 96 екипи кои ќе се натпреваруваат во четири меѓусебно поврзани нивоа, осигурувајќи дека пласманот ќе се базира на заслуги, наместо автоматско учество.
Натпреварувањето вклучува 96 екипи
Во највисокото ниво, првата лига, наречена Ѕвездена лига, ќе има 16 клуба поделени во две групи од по осум. Ќе се играат натпревари дома и на гости. Второто ниво, Златна лига, ќе има идентична структура со дополнителни 16 екипи. Четирите најдобри екипи од секоја група во Ѕвездената лига ќе се пласираат во четвртфиналето, кое ќе се игра во два натпревари. Натпреварувањето ќе заврши со „фајналфор“, каде полуфиналето и финалето ќе се играат во еден натпревар за да се одреди шампионот.
Во двете пониски лиги, Сината и Заедничката лига, ќе има четири групи од по осум екипи. Премиер лигата ќе има три загарантирани учесници во Ѕвездената лига, две места во Златната лига и до пет дополнителни места во останатите лиги. За разлика од првиот, широко критикуван концепт на Суперлига, каде 12 клубови имаа загарантирано учество, овојпат сите места ќе бидат заслужени преку настапите во домашните првенства.
Победници со загарантирано место
Победниците на Ѕвездената и Златната лига, кои ќе бидат познати по завршувањето на доигрувањата, ќе имаат загарантирано место во елитното ниво за следната сезона. Лигашката фаза ќе трае од септември до април.
Со вклучени нокаут-фази, победниците ќе одиграат вкупно 18 натпревари, со сличен формат за двете пониски лиги. Џон Хан, ко-основач на A22, изјави:
„Внимателно слушавме широка група клубови, лиги и навивачи и веруваме дека со овие промени имаме голема поддршка. Во овој момент не очекуваме јавно одобрување од клубовите, што е логично да дојде по официјалното признавање на Обединетата лига.
Претходниот концепт
Во април 2021 година, Реал Мадрид, Милан, Арсенал, Атлетико Мадрид, Челси, Барселона, Интер, Јувентус, Ливерпул, Манчестер Сити, Манчестер Јунајтед и Тотенхем објавија дека постигнале договор за создавање на Европска Суперлига. Новата лига требаше да биде конкурент на Лигата на шампионите, со 20 клуба – 15 основачи и пет дополнителни, според резултатите.
Раководството на Обединетата Лига со новото натпреварување има цел да го разбиe монополот на УЕФА. Европскиот суд за правда пресуди дека фудбалските федерации немале право да го спречат формирањето на новото натпреварување.
Првичната Суперлига не успеа да го регистрира името „Super League“ како заштитен знак во Европската Унија поради пресудата во корист на данската Суперлига. Поради тоа, новата лига ќе го носи името Обединета лига (Unify League).
