Брегалница ја зголеми предноста во однос на Тиквеш на големи седум бода, откако успеа да ја совлада Слога Виница со 1-3 во последното есенско коло од Втората лига Исток. Истовремено, Тиквеш „киксна“ на гости против Победа и ремизираше без голови. Ова му носи голема залиха на тимот на Марјан Секуловски за зимскиот одмор, а во пресрет на вториот дел од сезоната.
Мартин Стојанов во 11.минута ги доведе штипјани во водство, а Анес Османоски во 40.минута зголеми на 0-2. Слога Виница се понадева на реми со голот на Бојан Спасевски во 75.минута, но само четири минути подоцна Османоски со вториот гол ги расчисти дилемите.
Тиквеш имаше инцијатива против Победа, но овојпат затаија стрелците.
Кит Го беше убедлив на домашен терен против Плачковица и славеше со 5-1. Бошко Ступиќ го отвори резултатот, но Плачковица израмни преку Мартин Ристов. Сепак, Дарко Алексовски од пенал донесе предност за Кит Го на полувремето. Во вториот дел, уште три гола за домашниот состав, стрелаа Тони Мичковски, Зоран Андонов и Оливер Христов.
Каменица Саса го совлада Кожуф со 3-1, a Осогово беше надмоќен против Росоман (1-7).
