Македонскиот претставник Шкендија доживеа пораз од 2-0 од ерменскиот тим Ноа на гостувањето во Ереван, во првиот дуел од воведното квалификациско коло во Конференциската лига. Слично како и Струга ТЛ на вчерашниот меч против Слован Братислава, тимот на Шкендија ја загуби концентрацијата во последните десетина минути и прими два гола.
Шкендија беше рамноправна во најголем тек од натпреварот, но попусто кога на крајот составот на Јетон Беќири се враќа со два гола негатива од гостувањето во Ерменија.
Во 81.минута, Гонсало Грегорио донесе водство за тимот на Ноа. По аутот од левата страна, топката беше префрлена на вториот дирек, таму не реагираше Талевски, а Грегорио со удар со глава од непосредна близина ја затресе мрежата.
Во 90.минута, по корнерот од левата страна повторно слаба реакција на одбраната на Шкендија, а тоа го искористи Александар Миљковиќ и со удар со глава уште еднаш го надмудри Талевски.
Реванш натпреварот меѓу Шкендија и Ноа се игра в четврток од 20 часот, на Националната арена „Тодор Проески“ во Скопје.
