Вардар со ново искушение во Велес, Работнички го пречекува шампионот

Вардар ја оствари првата пролетна победа во минатото коло, но сега ќе мора да врзе неколку позитивни резултати во низа до крајот на шампионатот, затоа што и понатаму се наоѓа пред бездната. Тимот на Никола Илиевски Џиџи денеска (13 часот) го очекува тешко гостување во Велес против Борец, кој исто така има грижи околу опстанокот.

Силекс гостува кај последнопласираниот тим на Беласица, но тоа не значи и дека избраниците на Горан Симов лесно ќе ги освојат бодовите. Во Струмица има двојна програма, Академија Пандев е домаќин на Ренова, дуел кој исто така има големо значење во битката за опстанок.

Некако најмалку грижи во моментот имаат фудбалерите на Работнички и на Шкендија. „Романтичарите“ се на петтата позиција, отпаднаа од трката за Европа, а Шкендија и официјално ја освои титулата. Тоа значи дека може да се очекува интересен дуел.

„Секогаш е мотив да се надигра шампионот. Ќе го дадеме максимумот за да забележиме позитивен резултат и да се вратиме на вистински колосек по поразот од Шкупи. Верувам дека можеме да оствариме успех доколку ги исполниме поставените задачи од шефот на стручниот штаб Александар Влахо. Шкендија е квалитетен тим со одлични поединци, но се надевам дека со добра игра ќе успееме да ја реализираме нашата цел“, вели Димитар Тодоровски, фудбалерот за врска на Работнички.