Маркус Турам е категоричен дека во Интер сè уште веруваат во иднината на тимот и во својот тренер, и покрај поразот од 0-1 од Милан во дербито од 12. коло на италијанската Серија А. Турам имаше две клучни промашувања на почетокот на двете полувремиња, кои можеби ги онемозможија „нероаѕурите“ да стигнат до победата.
„Мислам дека требаше да ја насочам топката во друга насока. Бидејќи топката доаѓаше од едната страна, требаше да ја вратам назад покрај противниците“, изјави Турам.
Статистиката на Интер во директните дуели оваа сезона е застрашувачка, со порази од Јувентус, Наполи и Милан и единствена победа против Рома. За споредба, Милан ги победи Болоња, Наполи, Рома и Интер, а одигра нерешено со Јувентус, дури и кога не доминираше во играта.
„Не можам да го објаснам тоа, но со тренерот ќе најдеме решенија, бидејќи тој е одличен наставник и дава добри совети како да се подобриме. Вистина е дека ова беше голем натпревар, но е само ноември и има уште многу средби до крајот“, посочи Турам.
Се забележува дека „нероаѕурите“ се особено ранливи на контранапади, особено кога доминацијата во играта не се ефектуира и со голови.
„Бидејќи сакаме многу да ја контролираме топката, точно е дека кога ја губиме, стануваме ранливи на контранапади. Би рекол дека Милан и Реал Мадрид се најопасните тимови на контранапади во Европа. Знам дека загубивме, но мислам дека сме на вистинскиот пат. Имаме верба во тренерот и во овој проект, така што еден пораз не може да нè натера да го промениме мислењето за тоа. Секогаш има работи за подобрување, но не можеме сè да фрлиме по само еден пораз“, заврши Турам.
