Македонскиот првак Струга Трим Лум се наоѓа пред последниот чекор за пласман во групите од Конференциската лига. Тимот и досега испиша историја на европската сцена, забележа неколку победи, елиминираше квалитетни противници, а сега пред стружани е исправен исландскиот Брејдаблик, како последна пречка пред влезот во рајот.
Огромен успех би било тоа за клубот, но и за македонскиот фудбал, доколку Струга ТЛ успее да се пласира во групите од ова европско натпреварување.
Првиот дуел е денеска, со почеток во 17 часот на стадионот „Билјанини извори“ во Охрид.
„Подготвени сме, иако се соочуваме и со проблеми. Ќе го немаме Марјан Радески, а и јас ќе морам да бидам на трибините поради исклучувањето на претходниот европски меч. Но, тоа нема да нѐ поколеба, фудбалерите се максимално мотивирани и веруваме во сопствените квалитети. Секако, знаеме дека нема да биде лесно бидејќи Брејдаблик е одличен тим во кој настапуваат и тројца исландски репрезентативци. Струга ТЛ и досега испиша клупска историја на меѓународен план, а сега сме цврсто решени да го направиме и последниот чекор“, изјави тренерот Шпетим Дуро во пресрет на мечот.
Натпреварот меѓу Струга ТЛ и Брејдаблик е закажан за 17 часот.
