Академија Пандев обезбеди опстанок во Првата лига, а струмичкиот тим сега ќе се обиде и да стигне до трофеј оваа сезона. Вечерашното финале на Купот на Македонија е можност и за Академија Пандев, но и за ривалот Силекс, да обезбедат и излез на европска сцена.
Капитенот Ѓорѓи Стоилов се надева дека „пандевци“ ќе го задржат трофејот во витрините. Тие се последни освојувачи, со оглед дека минатата сезона натпреварувањето беше прекинато поради пандемијата на коронавирусот.
„Мотивирани сме максимално да го задржиме трофејот во витрините. Имаме максимален респект за Силекс, но мислам дека Академија Пандев апсолутно има квалитет за да слави во вечерашното финале. Знаеме дека не очекува тежок натпревар, но сите во тимот веруваме во успех“, истакнува капитенот Стоилов.
Финалната пресметка во Купот на Македонија се игра вечерва (19 часот) на Националната арена „Тодор Проески“ во Скопје. Главен судија на мечот ќе биде интернационалецот Александар Ставрев.
