Стефано Пиоли се враќа на клупата на Фиорентина. Искусниот италијански стратег повторно ќе го предводи тимот од Фиренца, откако денес клубот официјално го потврди неговиот ангажман.
Пиоли потпиша тригодишен договор и ќе се обиде да ја врати „виолетовата“ гордост на патеката на успесите.
Ова не е прво негово искуство со Фиорентина – Пиоли беше дел од тимот и во периодот 2017–2019, а како што вели претседателот Роко Комисо, токму таа блиска поврзаност со клубот и градот одиграла клучна улога.
„Од првиот момент кога разговарав со Стефано, знаев дека го најдовме вистинскиот човек. Тој ја познава душата на Фиренца и клубот, и подготвен е да се вложи со сè што има“, рече Комисо.
Последна тренерска станица на Пиоли беше саудиски Ал-Наср, а пред тоа остави длабока трага во Милан, освојувајќи ја титулата во Серија А во сезоната 2021/22. Во својата богата кариера го водеше и Интер, Лацио, Болоња, а како играч шест сезони носеше дресот на Фиорентина.
Сега се враќа таму каде што го познаваат најдобро – со цел да создаде нова успешна приказна на „Артемио Франки“.
