Силекс на пенали го освои Купот на Македонија

Силекс е освојувач на Купот на Македонија. По драматично изведување на пенали, тимот на Силекс го совлада составот на Академија Пандев со 4-3, откако по 120 минути немаше гол, а ниту сериозна шанса, во финалната пресметка на Националната арена „Тодор Проески“. „Пандевци“ не ги реализираа двата последни пенали, па пехарот од Купот на Македонија по цели 24 години се враќа во Кратово, а Силекс повторно ќе игра во Европа. Но, претходно, во вторник, тимот на Горан Симов ќе мора и да опстане во Првата лига, затоа што го очекува бараж против Тиквеш.

За разлика од неинвентивните два часа игра, беше драматично при изведувањето на ударите од белата точка. Во четвртата серија, Марко Јовановски го одбрани ударот на Пепи Ѓорѓиев, но и Даниел Божиновски успеа да го „улови“ шутот на Бојан Димоски. Драмата продолжи…

Силекс реализираше, а Кристијан Велиновски ја испрати топката над голот. Ја погоди гредата, а потоа топката заврши зад голот на Божиновски.