Шкупи сака да остане во трката за шампионската титула, а за тоа се потребни победи. Тимот на Хасан Озер денеска (14 часот) ја пречекува Академија Пандев и посакува нов триумф. На гостите им гори под нозе по поразот на стартот од Работнички (0-1) во Струмица, но тоа не е проблем на Шкупи.
„Нашата цел е победа на секој нареден меч. Академија Пандев има тим за респект, но ние сме подготвени за надигрување и посакуваме нов успех. Само на таков начин можеме да се наметнеме како кандидати за титулата“, изјави Кристијан Трапановски, екс-играчот на Академија Пандев.
Тимот на Александар Васоски ќе биде ослабен на овој дуел, без дефанзивците Димов и Манев, и без Шаркоски.
Борец загуби на стартот од Шкупи (0-1), а и денеска ќе има тешко гостување во Ѓорче Петров. Новиот тим на велешани ќе се обиде да остане непоразен, но Македонија ЃП тешко раздава бодови на домашен терен.
Пелистер и Ренова ќе имаат директен дуел за опстанок. Дефанзивецот Бојан Илиевски најави дека „зелените“ се подготвени за триумф, а Ренова бара рехабилитација по поразот на стартот од Беласица (2-4).
