Македонскиот прволигаш Шкендија ќе мора да одигра четири натпревари како домаќин надвор од Тетово (најмалку 100 километри), како казна на лошата организација на дерби-натпреварот против Шкупи во претпоследното коло од завршениот шампионат на Македонија. Дисциплинската комисија на ФФМ ја донесе оваа одлука откако претходно Натпреварувачката комисија го суспендираше стадионот во Тетово за настапите на Шкендија.
Со оглед дека првенството е завршено, суспензијата на Шкендија се префрлува на првите четири натпревари од следната натпреварувачка сезона, 2022/23.
Дополнително, Шкендија е казнета и парично, со 5.000 евра во денарска противвредност.
Оваа казна доаѓа како резултат на лошата организација од редовите на домаќинот. Во текот на натпреварот Шкендија – Шкупи имаше бројни прекини поради инциденти кои се случија на теренот и надвор од него, а меѓудругото беше удрен со предмет од трибините и помошниот судија, како и фудбалер на Шкупи.
