Шкендија и Шкупи победија, Вардар немоќен како никогаш досега

Најтрофејниот македонски клуб Вардар доживеа дебакл на гостувањето во Кратово откако загуби со 6-0 од Силекс во меч што требаше да биде директна борба за опстанок во елитата. Црно му се пишува на тимот предводен од поранешните истакнати фудбалери, Златко Таневски, Бобан Грнчаров и Никола Глигоров. Младинскиот тим надополнет со Најденов, Петковски и капитенот Блажевски беше буквално понижен во Кратово. Хет – трик постигна Дејан Ристов, а потоа со хет – трик се надоврза и Пепи Ѓоргиев.

Шкендија со 0-3 славеше против Ренова. Сите голови лидерот ги постигна во второто полувреме. Бесарт Ибраими, Игор Вандерсон да Силва и Дашмир Елези стрелаа за Шкендија.

Шкупи со 0-1 го победи тимот на Академија Пандев. Стрелец на голот беше Ламине Дијак во 78.минута од мечот. Академија Пандев имаше шанса за израмнување, но Марјан Радески во финишот не искористи пенал. Наумовски го одбрани неговиот удар.

Македонија ЃП ја совлада Беласица во Струмица со 0-2. Робсон да Силва погоди пред крајот на првиот дел, а Чарлестон во 84.минута зголеми на 0-2.

Струга Трим Лум оствари важен триумф (0-1) на гости против Борец во Велес. Победничкиот гол беше дело на Јасмин Мециновиќ во 48.минута.

ПРВА ЛИГА, 26.КОЛО

РЕНОВА – ШКЕНДИЈА 0-3

СИЛЕКС – ВАРДАР 6-0

АКАДЕМИЈА ПАНДЕВ – ШКУПИ 0-1

БЕЛАСИЦА – МАКЕДОНИЈА ЃП 0-2

БОРЕЦ – СТРУГА ТРИМ ЛУМ 0-1

ВЧЕРА: РАБОТНИЧКИ – ПЕЛИСТЕР 3-1