Легендата на Реал Мадрид и Севилја, Серхио Рамос, го постигна својот прв гол за новиот клуб Монтереј.
38-годишниот шпански ветеран, кој воедно беше и капитан на својот нов тим, се запиша во листата на стрелците во победата од 4-2 против Сантос Лагуна во натпревар од мексиканската елитна лига. Рамос погоди во 57. минута за 2-1 со својот специјалитет – удар со глава, откако одлично го искористи центаршутот од својот сонародник Серхио Каналес.
Подоцна, Сантос израмни, но со головите на Каналес и Херардо Артеага, Монтереј ги освои трите бода.
Ова беше втор натпревар за Рамос во новиот мексикански тим, а тој ги одигра сите 90 минути.
„Среќен сум за оваа тешко извојувана победа и за мојот прв гол во овој дрес. Благодарност до навивачите за поддршката“, напиша шпанската легенда на социјалните мрежи по триумфот и дебитантскиот погодок.
