Ретровизор 2022: Македонија го победи европскиот првак во Палермо, но потоа Бугарите нѐ вратија во реалноста

Фудбалската репрезентација на Македонија во 2022 година оствари една од најголемите победи во историјата. Заедно со претходниот триумф над Германија во Дуизбург, победата над актуелниот европски првак Италија (0-1) во Палермо ќе остане запишан со златни букви во нашето национално CV.

Александар Трајковски во последните моменти од натпреварот, на теренот што многу добро го познава во Палермо, го совлада Донарума и ги шокираше Италијанците одземајќи им го Мундијалот.

По ова следеше дуелот со Португалија на „Драгао“ во Порто, финалниот испит за пласман на Светското првенство, кој Македонија, за жал, не успеа да го положи. Избраниците на Благоја Милевски беа поразени со 2-0.

Блесокот од баражот потоа го снема во Лигата на нации. Добивме лекции од Грузија, и во Скопје (0-3) и во Тбилиси (2-0), а на крајот дојде шокот и со поразот од Бугарија (0-1) на арената „Тодор Проески“. Завршивме како третопласирани во групата, иако амбициите беа многу поголеми, да се напаѓа првото место.

2023 е пред нас, нов голем предизвик за фудбалскиот национален тим. Следна голема цел на „црвено-жолтите“ се квалификациите за пласман на ЕВРО 2024, а ривалите се навистина жестоки, Англија, Италија, Украина и Малта.