Напаѓачот Маркус Рашфорд призна дека размислувал да го напушти Манчестер Јунајтед пред доаѓањето на менаџерот Ерик тен Хаг.
25-годишниот англиски репрезентативец изјави дека холандскиот стручњак му ја дал потребната слобода, што се покажало како клучно за неговата одлука да продолжи да игра на „Олд Трафорд“.
Минатата сезона, која беше прва за Тен Хаг како менаџер на Манчестер Јунајтед, Рашфорд постигна рекордни во кариерата 30 гола во сите натпреварувања. Со нив тој им помогна на „црвените ѓаволи“ да завршат на третото место во Премиер – лигата и да го освојат Лига купот.
Рашфорд на почетокот на овој месец потпиша нов петгодишен договор со клубот.
„Пред да дојде менаџерот, размислував за промена. Во фудбалот тоа се случува, но секогаш има причина. Неговото доаѓање имаше големо влијание врз мене. Тој ми даде слобода. Во минатото бев во многу статична улога и Не можев да уживам во играта. Јас сум таква личност што мојот настап влијае на моето расположение. А кога не сум среќен, не можам да го играм мојот најдобар фудбал“, објасни Рашфорд.
Манчестер Јунајтед моментно се подготвува за стартот на сезоната во Премиер – лигата. Првиот натпревар на тимот е на 14 август против Вулверхемптон.
