„Случајот Негреира“ е нов голем скандал во шпанскиот фудбал во кој главната улога ја има Барселона. Против каталонскиот тим е покрената кривична постапка за исплата на членот на судиската комисија Енрикез Негреира за совет за судии и откриени се уплати од 7,3 милиони евра во периодот од 2001 до 2018 година. Поранешните челници на клубот имаа интересни одговори зошто се вршени плаќањата.
Барселона во последните денови е под голем притисок. Откако „случајот Негреира“ излезе во јавноста, обвинителството покрена постапка против каталонскиот тим и ги сомничи за корупција.
Каталонците од 2001 до 2018 година на поранешниот шеф на судиската комисија Енрикез Негреира му платиле повеќе од 7 милиони евра за совети за судиите, а процесот против Барса моментно е во тек.
Шпанските медиуми откриваат различни детали од истрагата. Сведоци ќе бидат поранешни претседатели и тренери, а еден од разговорите откриени во овој случај покажува зошто Барса му платила на Негреира.
„Плативме самоодбрана бидејќи судиите постојано му помагаа на Реал Мадрид. Тоа го криевме за да го заштитиме клубот“, изјави еден од поранешните челници на клубот.
За сѐ што се случува знаел и поранешниот претседател Сандро Росел. Неговите зборови во првиот мандат на Лапорта во клубот зборуваат многу.
„Го плаќаме Негреира? Ако сакаме да ја имаме нивната почит, мора да продолжиме да плаќаме“, беа зборовите на Росел кои се појавија во јавноста.
Меѓу оние кои ќе бидат повикани како сведоци во овој случај се и поранешните тренери на клубот Луис Енрике и Ернесто Валверде. Овој јавно го кажа своето мислење.
„Не знам за ниеден судиски извештај. Тоа е изненадување за мене. Уверен сум дека сѐ ќе се расчисти. Не се сеќавам дека имавме статистика за судиите кои требаше да ги судат нашите натпревари, како претходно судеа, како игравме кога судат, дали покажуваат повеќе картони. Имаше извештаи што ги добија моите помошници, но јас никогаш не ги ни погледнав“, изјави Валверде.
И претседателот на Ла Лига, Хавиер Тебас, е суров како никогаш кон каталонскиот гигант.
„Не знам дали позицијата што ја застапува претседателот на клубот е најдобра. Не се сеќавам на ваква криза во некој клуб. Се срамам и немаат објаснување во моментов“, изјави Тебас. .
И ставот на Жоан Лапорта е јасен. Барселона никогаш не ја купила наклонетоста на судиите и е подготвена да се бори за да го докаже тоа.
„Нека биде јасно дека Барселона никогаш не купувала судии и Барселона никогаш немала намера да купува судии, апсолутно никогаш“, е пораката на Жоан Лапорта.
Поради овој скандал, доколку бидат прогласени за виновни, на Барселона и се заканува одземање на 15 бода од оваа и минатата сезона.
