Рома е сериозно загрижена за иднината со тренерот Жозе Мурињо. „Специјалниот“ е многу посакуван од Португалската фудбалска федерација за нов национален селектор. Затоа, оттаму почнаа сериозна кампања со надеж дека ќе го убедат тренерот да ја напушти „волчицата“, тврди „Скај Италија“.
Во Португалија активно бараат нов селектор откако се разделија со Фернандо Сантош по елиминацијата во четвртфиналето на Светското првенство во Катар. Тие го насочија фокусот кон Мурињо и веруваат дека можат да го доведат од „Олимпико“.
Жозе Мурињо има договор со Рома до 2024 година и секогаш бил дециден дека има намера да го исполни. Интерес за него имаше од неколку англиски клубови, но тој брзо ги одби.
Сепак, сега ситуацијата е малку поинаква, бидејќи Мурињо отсекогаш сонувал да ја води репрезентацијата на својата земја и ќе му биде многу потешко да одбие таква можност, која можеби нема да ја добие вторпат во кариерата.
