Македонскиот второлигаш Победа се наоѓа во тешка ситуација и клубот се обидува да се реорганизира. За нов претседател е избран Емил Јанески, а нов спортски директор е Благоја Гешоски. До пред извесно време Победа беше акционерско друштво од пет акционери, секој со сопственост од по 20%. Сега, четири од петте акционери во клубот, односно сопствениците на 80% од акциите, го подарија својот дел на тројца фудбалски работници, членови на фудбалскиот клуб, па од тој момент Победа е фудбалски клуб на градот Прилеп.
Градоначалникот Илија Јованоски, поради фактот дека Победа е клуб на градот, формира координативно тело, со цел колективот подобро да функционира во периодот кој следи. За претседател на клубот е избран Емил Јанески, а за спортски директор Благоја Гешоски, кои заедно со актуелниот тренер Дарко Крстески ќе го водат клубот до крајот на првенството.
Во координативното тело ќе бидат вклучени и легенди на Победа, кои значат многу за фудбалот во градот и пошироко. Исто така, ќе се вклучат и членови од навивачките групи од општина Прилеп.
Победа се наоѓа на осмото место во ВМФЛ-Исток со 17 освоени бода по 22 одиграни средби.
