Килијан Мбапе (25) на крајот од сезоната го напушта Пари Сен Жермен. Тој го објави ова во видео што го сподели на социјалните мрежи. Мбапе досега одбиваше да ги коментира гласините за неговата иднина, а сега ги презеде работите во свои раце и официјално се прости од парискиот клуб. Тој во недела на првенствениот натпревар против Тулуз ќе истрча на „Паркот на принцовите“ за последен пат како играч на ПСЖ.
„Отсекогаш сум велел дека ќе ве контактирам кога ќе дојде време, па затоа сакам да ви објавам дека ова ми е последна година во Пари Сен Жермен. Нема да го обновувам договорот и авантурата ќе заврши за неколку недели“, рече Мбапе, заблагодарувајќи им се на сите со кои соработуваше во ПСЖ.
„Има многу емоции, има многу години во кои имав можност и голема чест да бидам член на најголемиот француски клуб и еден од најдобрите клубови во светот, што ми го даде првото искуство во клуб со голем притисок, исто така, ми овозможи да пораснам како играч покрај некои од најдобрите во историјата, да запознам многу луѓе и да пораснам како човек со целата слава што ја стекнав и сите грешки што ги направив.“
Иако не откри во кој клуб ќе ја продолжи кариерата, изјави дека заминува од Франција.
Сепак, медиумите со месеци пишуваат дека неговиот потпис за Реал Мадрид е речиси завршена работа. На крајот од оваа сезона Мбапе имаше опција да го продолжи договорот со ПСЖ на уште една година, но тоа нема да го стори, па ќе го напушти клубот без обештетување.
Тој пристигна во ПСЖ во 2017 година од Монако на 19-годишна возраст. Парижаните за него платија отштета од 180 милиони евра. За седум години во Париз, тој стана еден од најдобрите играчи во светот. Шестпати со ПСЖ го освојуваше францускиот шампионат. За парискиот клуб настапи 306 пати и постигна 255 гола.
