Напаѓачот на Пари Сен Жермен, Бразилецот Нејмар, изјави дека би сакал да играл во ист тим со Португалецот Кристијано Роналдо. Ова е веројатно најава за тоа што ќе се случи во летниот преоден рок, трансфер на Роналдо од Јувентус во ПСЖ.
Бразилецот, кој неодамна го продолжи договорот со францускиот клуб, сега изрази желба да соработува со напаѓачот на Јувентус, откако претходно изјави дека би сакал повторно да игра со Лионел Меси.
„Сакам да играм со Кристијано Роналдо. Веќе играв со одлични играчи како Меси и Килијан Мбапе, но сè уште не сум играл со Роналдо “, изјави Нејмар за францускиот магазин „GQ“.
Се шпекулира дека Роналдо ќе го напушти Јувентус доколку тимот од Торино не избори пласман во Лигата на шампионите. „Старата дама“ во моментов е на петтото место на табелата, на три кола пред крајот на сезоната во Серија А.
