Наполи официјално го претстави своето најново засилување во нападот – Лоренцо Лука, кој пристигнува од редовите на Удинезе. Договорот е структуриран како позајмица во висина од 9 милиони евра со задолжителна опција за откуп за дополнителни 26 милиони евра, со вклучени бонуси. Поранешниот клуб на Лука, Пиза, ќе добие 10% од вкупната трансферна сума.
Штом трансферот стане траен, 24-годишниот напаѓач ќе потпише договор со важност до 2030 година, со годишна плата од 2 милиони евра.
Наполи се реши за ангажманот на Лука откако се откажа од првичната цел Дарвин Нуњез од Ливерпул. Италијанскиот шампион успеа да го обезбеди потписот на Лука и покрај интересот од Аталанта и Милан.
Италијанскиот репрезентативец има пет настапи за националниот тим и зад себе има две успешни сезони во дресот на Удинезе, каде одигра 75 натпревари и постигна 23 голови со шест асистенции.
Со ова Лука станува петто летно засилување за Наполи, а клубот наскоро ќе го официјализира и трансферот на дефанзивецот Сем Бојкема од Болоња.
