Поранешниот играч за врска на Реал Мадрид, Лука Модриќ, пристигна во Милано. Хрватскиот ас слета на аеродромот „Малпенса“ со приватен авион од Мадрид нешто по 10 часот.
Денешниот ден ќе биде интензивен за 39-годишниот фудбалер. Најпрво ќе помине медицински прегледи во клиниката „Ла Мадонина“, потоа ќе изврши дополнителни тестирања во „Сентро Амброзијано“, ќе го потпише договорот со Милан и ќе ја посети клупската база, каде што ќе се сретне со тренерот Масимилијано Алегри и своите нови соиграчи.
Иако денот му е исполнет со обврски, Модриќ ќе остане во Милано само еден ден. Веќе вечерва ќе отпатува за Загреб за да се одмори по напорната сезона. Италијанските медиуми објавуваат дека со подготовките со Милан ќе ги започне на почетокот од август.
Неговиот последен натпревар во дресот на Реал беше минатата среда, кога „кралскиот клуб“ беше поразен со убедливи 0:4 од Пари Сен Жермен во полуфиналето на Светското клупско првенство.
Модриќ пристигнува во Милан како слободен агент и ќе потпише договор на една година. Според информациите, неговата годишна плата ќе изнесува 4 милиони евра.
„Среќен сум што сум тука, ме очекуваат големи предизвици“, изјави кусо Модриќ при излегувањето од аеродромот.
